புதுடெல்லி செப், 26
பண வீக்கத்தை கட்டுப்படுத்த அமெரிக்க மத்திய வங்கி உள்பட பல நாடுகளின் வங்கிகள் வட்டி விகிதத்தை அதிகரித்துள்ளன. வட்டி விகித அதிகரிப்பு அன்னிய செலவாணி சந்தையில் அமெரிக்க டாலரின் தேவையை அதிகரித்து அதன் மதிப்பை உயர்த்தியுள்ளது.
மேலும் அமெரிக்க டாலருக்கு எதிரான இந்திய ரூபாயின் மதிப்பு வரலாற்றில் இதுவரை இல்லாத வகையில் சரிவைக் கண்டது.
வாரத்தின் முதல் நாளான இன்று இந்திய பங்குச்சந்தை வர்த்தகத்தை தொடங்கியது முதல் டாலருக்கு நிகரான இந்திய ரூபாயின் மதிப்பு வீழ்ச்சியடைந்து வருகிறது.
வர்த்தகம் தொடங்கியது முதல் சந்தையில் முதலீடுகள் வெளியேற்றம், முதலீடுகளை டாலருக்கு மாற்றுதல், கச்சா எண்ணெய் விலை, உக்ரைன் – ரஷியா போர் உள்பட பல காரணங்கள் டாலருக்கு நிகரான ரூபாயின் மதிப்பு சரிவை சந்தித்துள்ளது.
பங்குச்சந்தையில் இன்று காலை வர்த்தகம் தொடங்கியதுமே அமெரிக்க டாலருக்கு இந்திய ரூபாயின் மதிப்பு 81.47 ஆக வீழ்ச்சியடைந்துள்ளது. இதைத் தொடர்ந்து அமெரிக்க டாலரின் மதிப்பு உயர்ந்து வருவதால் இந்திய ரூபாயின் மதிப்பு வீழ்ச்சியடைந்து வருகிறது.