ஜெய்ப்பூர் செப், 19
ராகுல் காந்தியை மீண்டும் காங்கிரஸ் தலைவராக்க வேண்டும் என்ற கோரிக்கை அக்கட்சியின் தொண்டர்கள் மத்தியில் மீண்டும் எழ தொடங்கியுள்ளது. சத்தீஸ்கர், ராஜஸ்தான் மாநில காங்கிரஸ் கமிட்டிகள் இது தொடர்பாக தீர்மானத்தை நிறைவேற்றியுள்ளனர்.
மேலும் ராகுல் காந்தியை கட்சியின் தலைவராக்கும் நோக்கில் இரு மாநில காங்கிரஸ் கமிட்டிகளும் தீர்மானத்தை நிறைவேற்றியுள்ளதாக சத்தீஸ்கர் முதலமைச்சர் பூபேஷ் பாகேல் ஞாயிற்றுக்கிழமை அன்று தெரிவித்துள்ளார். தலைவர் பதவியை மீண்டும் ஏற்க மாட்டேன் என்பதில் ராகுல் காந்தி உறுதியாக இருக்கும் நிலையில், முடிவை அவர் மறுபரிசீலனை செய்ய வேண்டும் என பாகேல் கோரிக்கை விடுத்துள்ளார்.
சத்தீஸ்கர் மாநில காங்கிரஸ் கமிட்டி, முக்கிய கூட்டம் ஒன்றை நடத்தியது. மாநில அளவில் அமைப்பு தேர்தல் தொடர்பாக இக்கூட்டம் கூட்டப்பட்டது. ஆனால், இதில் காங்கிரஸ் கட்சியின் தலைவராக ராகுல் காந்தி மீண்டும் பொறுப்பேற்க வேண்டும் என ஒருமனதாக தீர்மானம் நிறைவேற்றப்பட்டது.
மேலும் இத்கூட்டத்தில், முதலமைச்சர் பூபேஷ் பாகேல், கட்சியின் மாநில பொறுப்பாளர் புனியா மற்றும் மாநிலத்தின் பிற தலைவர்கள் கலந்து கொண்டனர்.
இதனைத் தொடர்ந்து, காங்கிரஸ் தலைவர் ராகுல் காந்தியை கட்சியின் தலைவராக்க ராஜஸ்தான் காங்கிரஸ் கமிட்டியும் தீர்மானம் நிறைவேற்றியுள்ளது குறிப்பிடத்தக்கது. ராஜஸ்தான் முதலமைச்சர் அசோக் கெலாட், கூட்டத்தில் ஒரு திட்டத்தை முன்வைத்தார். அதில், ராஜஸ்தான் மாநில காங்கிரஸ் கமிட்டி தலைவர் மற்றும் அகில இந்திய காங்கிரஸ் கமிட்டி பிரதிநிதிகளை காங்கிரஸ் தலைவர் தேர்ந்தெடுக்க வேண்டும் என்றும் தீர்மானம் நிறைவேற்றப்பட்டது. காங்கிரஸ் செயற்குழு உறுப்பினர் ரகுவீர் மீனா இந்த தீர்மானத்திற்கு ஒப்புதல் அளித்தார். இதற்கு மாநிலத் தலைவர் கோவிந்த் சிங் தோட்சராவும் ஆதரவு அளித்தார்.
இதனையடுத்து காங்கிரஸ் தலைவர் தேர்தலுக்கான அறிவிப்பு செப்டம்பர் 22 அன்று வெளியாகும். காங்கிரஸ் தலைவர் பதவிக்கான வேட்புமனுக்களை செப்டம்பர் 24 முதல் செப்டம்பர் 30 வரை தாக்கல் செய்யலாம். வேட்புமனு தாக்கல் செய்ய கடைசி நாள் செப்டம்பர் 30, 2022. வாபஸ் பெறுவதற்கான கடைசி தேதி அக்டோபர் 8 ஆகும்.
காங்கிரஸ் தலைவர் பதவிக்கான தேர்தல் அக்டோபர் 17ம் தேதி நடைபெறும் என காங்கிரஸ் காரிய கமிட்டி முடிவு செய்துள்ளதாக தகவல்கள் தெரிவிக்கின்றன. அக்டோபர் 19ம் தேதி வாக்கு எண்ணிக்கை நடைபெறும்.